NAMAZ VAXTLARI:
  • FƏCR 03:45
  • GÜN 05:26
  • ZÖHR 12:47
  • ŞAM 20:27
  • GECƏ 00:00
BİZİMLƏ ƏLAQƏ:[email protected] +994 70 4240255
HAVA PROQNOZU:

İDMAN

Oxundu: 614
Anası və atasını qətlə yetirən terrorçulardan qaçıb məşhurlaşan futbolçu - FOTOLAR

Anası və atasını qətlə yetirən terrorçulardan qaçıb məşhurlaşan futbolçu - FOTOLAR

Rusiyada keçirilən futbol üzrə dünya çempionatında artıq bu gün ikinci turun oyunları baş tutacaq. Bu çempionatda öz oyunu ilə diqqət mərkəzinə düşənlər də var, fanatları məyus edənlər də…

İdman növləri içərisində hər kəsin maraq bəslədiyi futbolu bütün dünya sevir. Futbolun bəzəyi isə gözəl oyun və vurulan qoldur.

 

 Rusiyada keçirilən futbol üzrə dünya çempionatının ilk turunda futbol azarkeşlərinin böyük ümidlə gözlədiyi, gözəl oyun sərgiləyəcəyini düşündüyü futbolçular öz oyunları ilə azarkeşləri məyus etdilər. Əvəzində bu çempionatın elə qrup turnirinin ilk oyunlarında öz oyunları ilə bütün dünyanın sevimlisinə çevrilənlər də oldu.

 

 

Sözsüz, çempionatın bəzəyi olan oyunlardan biri “F” qrupunda keçirilən Almaniya-Meksika görüşü idi. Bu oyun bütün proqnozları alt-üst etdi. Meksikalılar öz əzmkarlıqları nəticəsində inamlı qələbə qazandılar. “D” qrupunun Xorvatiya-Nigeriya oyunu da maraqlı oyunlardan biri idi. Afrikalılar bu oyunda bəxtsizlikdən öz rəqiblərinə uduzdular.

 

Şübhəsizdir ki, Nigeriya komandasının heyətində həmin gün bir ulduz var idi. Bu oyun boyu ən çox qayda pozuntusuna məruz qalan futbolçu Victor Moses idi. Həmin günə qədər sadəcə Londonun “Çelsi” klubunun ortabab futbolçularından biri olan Moses o gün öz oyunu ilə təkbaşına bütün Xorvatiya komandasını üstələyirdi. Yüksək əzmkarlıq, özünə inam Mosesin istedadını ortaya qoyurdu.

 

Londonun “Çelsi” klubunun və Nigeriya millisinin üzvü Victor Mosesin olduqca dəhşətli bir ailə hekayəsinin olduğunu bilirdinizmi?

 

Victor Mosesin həyat hekayəsi bir film ssenarisinə bənzəyir.

 

 

İngiltərə Premyer Liqasında çıxış edən “Çelsi”də forma geyinən Victor Mosesin həyatı çoxlarının bəlkə də həyatıboyu yaşamadığı əzablarla doludur.

 

Victor Moses 12 dekabr 1990-cı ildə Nigeriyanın Kaduna şəhərində doğulub. Onun ailəsi Moses hələ 4 yaşında olarkən Lagos şəhərinə köçür. Kiçik yaşlarından futbolla maraqlanan Moses, 5 yaşından Lagos şəhərində futbol məktəbinə yazılır.

 

Xristian bir ailədə böyüyən Moses üçün Lagosda həyat heç də xoş keçmirdi. Çünki şəhərdə dinlərarası savaş gedirdi. Müxtəlif dini qruplaşmaların üzvləri olan terroçular şəhərdə silahlı insidentlər həyata keçirir, qətllər törədirdilər. 2002-ci ilin mart ayında komanda yoldaşları ilə oyuna gedən Moses geri dönəndə gördüyü mənzərədən dəhşətə gəlir. Onun ailəsi terroçular tərəfindən qətlə yetirilmişdi.

 

Bu hadisədən sonra balaca Victor güclü sarsıntı keçirir. Təkbaşına bir gün evdə qalan Victoru əmisi himayəyə götürür. O balaca Victoru ölkədən çıxarmağa qərar verir. Çünki terroçular bütün şəhərdə balaca Victoru axtarırdılar. Əmisi onu gizli yollarla ölkədən qaçırır.

 

Cəmi bir həftə sonra Victor Moses və əmisi artıq İngiltərədə idilər.

 

 

Mosesin əmisi kiçik istedadı yaxınlıqdakı futbol məktəbinə yazdırır. 2004-cü ildə scoutlar tərəfindən kəşf edilən Moses, “Kristal Pelas” klubunun uşaq komandası ilə müqavilə bağlayır. 2007-ci ildə “Kristal Pelas”la İngiltərə Premyer Liqasında debut edən Victor öz oyunu ilə hər kəsi heyran edir. Artıq 20 yaşında, 2010-cu ildə Victor Moses “Viqan”la müqavilə bağlayır. Moses burada 80 matçda 9 qol vurmağı bacarır.

 

Moses, 2012-ci ildə “Çelsi”yə transfer olunur. “Liverpul”, “Stok Siti” və “Vest Hem” klublarında icarə əsasında oynayan Moses, 2016-cı ildə yenidən “Çelsi”yə dönür.

 

Moses, “Çelsi” forması altında 2012-2013-cü il sezonunda UEFA Avropa Liqasının, 2017-ci ildə isə İngiltərə Premyer Liqasının qalibi olur.

 

 

Nigeriya Milli Komandasının formasını geyinən Moses 2013-cü ildə Afrika Çempionu olur. Nigeriyanın ən təhlükəli futbolçusu hesab edilən Moses milli komandada keçirdiyi 28 oyunda 10 qolun müəllifi olub.

 

O son müsahibəsində “həyatda əmimdən başqa heç kimim yoxdur” deyərək, bütün uğurlarını ata-anasına həsr etdiyini dilə gətirmişdi. Moses xeyriyyəçilikdən də geri qalmır. Doğulduğu Kaduna şəhərində futbol məktəbi açan Victor Moses, həm də istedadlı gənclərin Avropaya yolunu açmaqla böyük bir missiyanın daşıyıcısına çevrilib…     Yenicag.az

Ctrl+ Enter Mətndə səhv var? Onu seçin və "Ctrl+Enter" düyməsini basın

ŞƏRH YAZIN


DİGƏR İDMAN XƏBƏRLƏRİ

BÜTÜN XƏBƏRLƏR
Orphus system